တောင်အမေရိကတိုက်အနောက်ပိုင်း ၊ အမေဇုန်မြစ်ဝှမ်းရဲ့ မိုးသစ်တောတို့ ဇာတိဖြစ်တဲ့ Pygmy marmosets မျောက်များဟာ New world မျောက်မျိုးစိတ်ထဲက အသေးစားမျောက်မျိုးစိတ်ပဲ ဖြစ်ပါတယ်။ ဒီမျောက်တွေဟာ ပျမ်းမျှ ၁၀၀ ဂရမ် ( ၃.၅အောင်စ ) ကျော်သာရှိပြီး ကမ္ဘာ့အသေးဆုံး မျောက်များအဖြစ် ထင်ရှားလူသိများပါတယ်။ အထီးအမ တစ်စုံနဲ့ မွေးဖွားထားသော အမျိုးနွယ် သားပေါက် လေးကောင်ဝန်းကျင် ဖြင့် ခုနှစ်ကောင် မှ ကိုးကောင်ကြား အုပ်စုဖွဲ့နေလေ့ရှိကြပါတယ်။
နီညိုရောင် ၊ ရွှေရောင် ၊ မီးခိုးရောင် နဲ့ အနက်ရောင်ရောဆက်ထားတဲ့ အမွေးများရှိပြီး နောက်ကျော နဲ့ ဦးခေါင်းမှာ အဝါရောင် ၊ လိမ္မော်ရောင် တို့ ရှိပါတယ်။ ခြေထောက်ပိုင်းသည် အညိုရောင် ရှိပြီး အမြီးမှာ အနက်ရောင်အကွင်းလေးများနဲ့ ပုံဖော်ထားပါတယ်။ Pygmy marmosets များဟာ သူတို့ရဲ့ ဦးခေါင်းကို ၁၈၀ ဒီဂရီအပြည့် လှည့်နိုင်ကြပြီး သစ်ပင်ရဲ့ အကိုင်းအခတ်များ နဲ့ ပင်စည်ကို တွယ်ကပ်တတ်နိုင်ဖို့ ချွန်ထက်တဲ့ လက်သည်းများလည်း ပါရှိပါတယ်။
သစ်ကိုင်းများကြား အမြင့်ဆုံး ၅မီတာ ( ၁၆ ပေ ) အထိ ခုန်နိုင်ပြီး ပျမ်းမျှဘဝသက်တမ်း ၁၅ နှစ် မှ နှစ် ၂၀ အထိ ရှင်သန်နိုင်ကြပါတယ်။ သစ်ပင်ရဲ့ ပင်စည်အခေါက်မှ ထွက်တဲ့ အစေးရည်များကို အဓိကစားသုံးကြပြီး ဝတ်ရည် ၊ သစ်သီး တို့ကိုလည်း စားလေ့ရှိပါတယ်။ ရာသီဥတုပြောင်းလဲခြင်း ၊ တောမီးလောင်ခြင်း ၊ တောရိုင်းများတွင် သစ်ပင်များပေါ်မှ ပြုတ်ကျခြင်းတို့ကြောင့်အသေအပျောက်များခဲ့ပြီး ယနေ့မှာတော့ ကမ္ဘာပေါ်က ရှားပါးမျောက်မျိုးစိတ်ဝင် မျောက်တစ်မျိုးပဲ ဖြစ်ပါတယ်။