ထန်တလန်မြို့နယ်ဝန်းကျင်တိုက်ပွဲများကြောင့် ထွက်ပြေးတိမ်းရှောင်နေရသူများ စားနပ်ရိက္ခာ အခက်အခဲဖြစ်နေ

စက်တင်ဘာ ၁၈ ရက်နေ့က ချင်းပြည်နယ် ထန်တလန်မြို့နယ်မှာ CDFနဲ့ စစ်ကောင်စီတပ်တို့ကြား တိုက်ပွဲဖြစ်ပွားခဲ့ပြီးနောက် ထွက်ပြေးတိမ်းရှောင်နေရသူ (၅၅၀၀) နီးပါး ရှိလာပြီး ၎င်းတို့ရဲ့ နေထိုင်၊ စားသောက်ရေးများ အခက်အခဲများရှိနေပါတယ်။

စစ်ကောင်စီတပ်ကို လက်နက်ကိုင်တော်လှန်ရာတွင် ချင်းလက်နက်ကိုင်အဖွဲ့များက ရှေ့ရောက်နေပြီး အမျိုးသားညီညွတ်ရေးအစိုးရ (NUG) က ပြည်သူ့ခုခံစစ်စတင်ကြောင်း ကြေညာပြီးနောက်တွင်လည်း တိုက်ပွဲများ ခပ်စိပ်စိပ်ဖြစ်ပွားခဲ့တာ ဖြစ်ပါတယ်။

 “ထန်တလန်မြို့မှာ တစ်မြို့လုံးနီးပါး ပြေးတာဆိုတော့ မြို့ပေါ် လူမကျန်တော့သလောက် ဖြစ်သွားပြီ။ အခုတော့ လူ ၂၈ ဦးပဲ ကျန်တော့တယ်။ တချို့ သက်ကြီးရွယ်အိုတွေပဲတော့ အိမ်မွေးတိရစ္ဆာန်တွေကို စောင့်ကြည့်ရမယ်ဆိုပြီး  အိမ်စောင့်အဖြစ်ကျန်ရစ်ခဲ့ရတယ်။ ကျန်ရှိနေသောလူတွေကတော့ မြို့အဝင် မိဘမဲ့ဂေဟာက မိဘမဲ့ကလေးတွေနဲ့ မြို့ပေါ်မှာနေတဲ့ မိသားစု ၄ စုလောက်ပဲ ရှိတော့ကြောင်း” ဒေသခံတစ်ဦးက ပြောပါတယ်။

တိုက်ပွဲမှာ လက်နက်မမျှဘဲ စစ်ကောင်စီဘက်က လက်နက်ကြီးတွေပါသုံးပြီး ပြန်လည်ပစ်ခတ်ခဲ့တာကြောင့် ထွက်ပြေးတိမ်းရှောင်ခဲ့ရတဲ့ ပြည်သူတွေက စားနပ်ရိက္ခာနှင့် ကျန်းမာရေးအတွက် လိုအပ်ချက်များရှိတယ်နေပါတယ်။ 

“တိမ်းရှောင်သွားရတဲ့သူတွေက အလောတကြီးပြေးခဲ့ရတာ။ အများစုက တစ်ပတ်စာခန့် စားသောက်ရန်ရိက္ခာပဲ ပါလာတာ။ စစ်ဘေးလာရှောင်ရတာက တစ်လတောင်မပြည့်သေးဘူး အဲ့ဒါတောင်မှ စားနပ်ရိက္ခာပိုင်းမှာ တော်တော်လေး ဒုက္ခရောက်နေရပြီ။ အချိန်တော်တော်ကြာကြာ နေရပ်ဒေသကို မပြန်ဘူးဆိုရင် စားနပ်ရိက္ခာနှင့် ကျန်းမာရေးအတွက် လိုအပ်ချက်ပိုမိုများပြားလာနိုင်တယ်" လို့ Thantlang Placement Affairs Committee-IDPs help (TPAC) အဖွဲ့မှသိရပါတယ်။

Source : Thantlang Placement Affairs Committee-IDPs help (TPAC)