အကြမ်းဖက်မှုတွေနဲ့ မီးရှို့ဖျက်စီးမှုတွေကြောင့် ဒုက္ခရောက်နေကြရရှာတဲ့ စစ်ဘေးရှောင်နှင့် မီးဘေးသင့်ပြည်သူများ

နိုင်ငံရေးမတည်ငြိမ်မှုတွေနဲ့ ကပ်ရောဂါဆိုးကြီးတွေကြောင့် လက်ရှိအခြေအနေတွေမှာ ပြည်သူတွေအနေနဲ့ အသက်အိုးအိမ်စည်းစိမ်တွေ အများအပြား ဆုံးရှုံးနေကြရပြီ ဖြစ်ပါတယ်..။ ပိုမိုပြင်းထန် တင်းမာလာတဲ့ လက်ရှိအခြေအနေတွေမှာ တိုက်ပွဲတွေနဲ့ အကြမ်းဖက်လုပ်ရပ်တွေကြောင့် ပြည်သူတွေမှာ အထိနာကာ ဆင်းရဲဒုက္ခပေါင်းစုံနဲ့ စစ်ဘေးရှောင်နေကြရတာ တော်တော်များများပါပဲ။ 

အကြမ်းဖက်တပ်တွေဟာ ဂန့်ဂေါနယ်ထဲကရွာတွေကို ဝင်ရောက်မွှေနှောက် မီးရှို့ဖျက်ဆီးခဲ့တာကြောင့် သာလင်း၊ မြင်သား၊ နှမ်းခါးနဲ့ ထယ်လှော်ကျေးရွာတွေက စုစုပေါင်းအိမ်ခြေ (၈၀)ခန့်အထိ ပြာကျပျက်စီးခဲ့ရပါတယ်။ နေအိမ်တွေကို မီးရှို့ဖျက်စီးတဲ့အပြင် လူမဆန်စွာ မတရားနှိပ်စက်သတ်ဖြတ်လို့ အပြစ်မဲ့ပြည်သူတွေ အများအပြားသေဆုံးခဲ့ကြရပြီး ဂန့်ဂေါ-ကလေးလမ်းတစ်လျှောက်မှာ စစ်ရေးတင်းမာနေမှုကြောင့် ဒေသခံပြည်သူတွေလည်း ဘေးလွတ်ရာကို တိမ်းရှောင်ထွက်ပြေးနေကြရတာ ဖြစ်ပါတယ်။ 

စစ်ဘေးရှောင်နဲ့ မီးဘေးသင့်ပြည်သူများအတွက် အစားအသောက်အပြင် ဆေးဝါးတွေလည်း လိုအပ်နေတာကြောင့် အခက်အခဲတွေနဲ့ ရင်ဆိုင်ကြုံတွေ့နေရတယ်လို့ သိရပါတယ်။ လက်ရှိအခြေအနေအရ ဂန့်ဂေါမြို့နယ်တွင်း ပြည်သူတွေအနေနဲ့ လုံခြုံရေးအသိ အမြဲရှိဖို့လိုအပ်နေပြီး အစားအသောက်နဲ့ ဆေးဝါးတွေလည်း လိုအပ်နေမို့ ပြည်သူအချင်းချင်း ရိုင်းပင်းကူညီကြဖို့ တိုက်တွန်းလိုက်ပါတယ်နော်။