တိုက်ပွဲရှေ့တန်းမှာ ကျဆုံးသွားတဲ့ ပြည်သူ့ရဲဘော်အတွက် အလေးပြုချီတက်ခဲ့ကြတဲ့ မန္တလေးက သပိတ်စစ်ကြောင်း

ဖေဖော်ဝါရီ (၁)ရက် ၊ ၂၀၂၁ မှ စ၍ မြန်မာနိုင်ငံဟာ စစ်ကောင်စီရဲ့ အာဏာထိန်းချုပ်မှုအောက် ရောက်ရှိနေခဲ့တာဖြစ်ပါတယ်။တစ်နိုင်ငံလုံးရှိ ပြည်သူများဟာလည်း ဖေဖော်ဝါရီ (၄) ရက်နှင့် (၅)ရက်မှ စ၍ အာဏာထိန်းချုပ်မှုကို ဆန္ဒထုတ်ဖော်မှုများပြုလုပ်ခဲ့ကြပါတယ်။ငြိမ်းချမ်းစွာ ဆန္ဒထုတ်ဖော်မှုများကို စစ်ကောင်စီက မတ်လ၊ဧပရယ်လ နှင့် မေလများမှာ ဆက်တိုက် ဖြိုခွင်းခဲ့ပါတယ်။ထိုမှတစ်ဆင့် ဝရမ်းထုတ်ခံရသူများ၊ဖမ်းဆီးခံခဲ့ရသူများ၊ချုပ်နှောင်ခံထားရသူများနှင့် ကျဆုံးသူပေါင်းများစွာရှိလာပါတယ်။

ဒီလူတွေထဲမှာ ကလေးသူငယ်မှအစ သက်ကြီးရွယ်အိုများ၊ကျောင်းသားလူငယ် အစရှိသရွေ့ လူတန်းစား အမျိုးအစား ပေါင်းစုံပါဝင်နေပါတယ်။ဒါ့ကြောင့်လည်း ကျောင်းသားလူငယ်တွေဟာ အမြဲတစေ ပြည်သူလူထုအား သွေးမအေးအောင် ယခုကာလမှာ ပျောက်ကြားသပိတ်တွေနဲ့ သတိပေးလေ့ရှိကြပါတယ်။

ယမန်နေ့ စက်တင်ဘာ(၂၂) ရက်နေ့မှာလည်း လူငယ်တွေစုရုံးကာ ရှေ့တန်းမှာကျဆုံးသွားတဲ့ ရဲဘော်တစ်ဦးအတွက် အောက်မေ့ဖွယ်အမှတ်တရ သပိတ်စစ်ကြောင်းပြုလုပ်ခဲ့ကြပါတယ်။ကျဆုံးရဲဘော် အမည်မှာ စိုင်းဉာဏ်လင်းသန့် ဖြစ်ပြီး သူဟာ စက်မှုလက်မှုသိပ္ပံ​ (မန္တ​လေး)ကျောင်းသားများသမဂ္ဂ ဒု ဥက္ကဌ အဖြစ်တာဝန်ယူထားသူဖြစ်​ပါတယ်။ သူဟာ ဆန္ဒပြသပိတ်စစ်ကြောင်းများရှိစဥ်ကာလတည်းက အားတက်သရော လှုပ်ရှားခဲ့သူဖြစ်ပါတယ်။ယခုအခါမှာလည်း ပြည်သူ့ကာကွယ်ရေးအတွက် တိုက်ပွဲဝင်ရာမှ စက်တင်ဘာ (၂၁)ရက်နေ့မှာ ရှေ့တန်းမှာကျဆုံးခဲ့ခြင်းဖြစ်ကြောင်းသိရပါတယ်။မြင့်မြတ်စွာကျဆုံးသွားတဲ့ ရဲဘော် အတွက် အောက်မေ့ဖွယ်သပိတ်စစ်ကြောင်းချီတက်ကာ အလေးပြုကြတဲ့ လူငယ်များရဲ့ ပုံရိပ်တွေကို ပရိတ်သတ်အနေနဲ့ ကြည့်ရှုခံစားပေးပါဦးနော်။