ပြီးခဲ့တဲ့ရက်ပိုင်းကတော့ ချင်းပြည်နယ်၊ထန်တလန်မြို့မှာ တိုက်ပွဲတွေဖြစ်ပွားခဲ့ပြီး ဒေသခံပြည်သူတွေရဲ့ နေအိမ်တွေပေါ် လက်နက်ကြီးတွေ ကျရောက်ခဲ့ပါတယ်။ လက်နက်ကြီးတွေနဲ့ ပစ်ခတ်မှုကြောင့် ထန်တလန်မြို့က နေအိမ်အချို့ ရစရာမရှိအောင် မီးလောင်ပျက်စီးသွားတဲ့အပြင် သင်းအုပ်ဆရာတစ်ဦးလည်း သေနတ်နဲ့ ပစ်ခတ်ခံရပြီး အသက်သေဆုံးသွားခဲ့ပါတယ်။ ထန်တလန်မြို့က မြို့နေပြည်သူအများစုဟာ အဆိုပါအဖြစ်အပျက်တွေကြောင့် ထန်တလန်မြို့ကို စွန့်ခွာနေကြပါတယ်။
အချိန်အတော်ကြာနေထိုင်ခဲ့တဲ့ မြို့ကို စွန့်ခွာနေကြတာ ဖြစ်ပြီး ယခုမှာတော့ ထန်တလန်မြို့မှာ လူသွားလူလာမရှိတော့ဘဲ တိတ်ဆိတ်ခြောက်ကပ်နေခဲ့ပါတယ်။ စက်တင်ဘာလ (၂၁)ရက်နေ့ မနေ့ကတော့ ထန်လတန်မြို့မှာ နေထိုင်နေတဲ့ အဘွားအိုတစ်ဦးဟာ ဆုံးပါးကွယ်လွန်သွားခဲ့ပါတယ်။ ထန်တလန်မြို့မှာ လူနည်းစုလောက်သာ ကျန်ရှိတော့တာဖြစ်လို့ အသုဘချပေးမယ့် လူမရှိဖြစ်နေပြီး ကွယ်လွန်သွားတဲ့ ရုပ်အလောင်းကို သုသာန်သို့ ပို့ဆောင်ဖို့လည်း အခက်အခဲရှိနေခဲ့ပါတယ်။
အသုဘချပေးမယ့်လူမရှိတာကြောင့် ဟားခါးမြို့က ကိုဗစ်ကာကွယ်ရေးအသင်းက ထန်တလန်မြို့ကို သွားရောက်ပြီး ဆုံးပါးကွယ်လွန်သွားတဲ့ ရုပ်အလောင်းကို မြုပ်နှံပေးခဲ့ကြောင်း သိရှိရပါတယ်။ဟားခါးမြို့ရှိ ကိုဗစ်ကာကွယ်ရေးအသင်းက ဆုံးပါးသွားတဲ့ အဘွားအိုကို အုတ်ဂူသွင်းပြီး သေသေချာချာသဂြိုလ်ပေးခဲ့တာပဲ ဖြစ်ပါတယ်။ ထန်တလန်မြို့က အဘွားအိုတစ်ဦးရဲ့ ရုပ်အလောင်းကို လာရောက်သဂြိုလ်ပေးနေခဲ့တဲ့ ဟားခါးမြို့က ပရဟိတသမားတွေရဲ့ ပုံရိပ်တွေကို ပြန်လည်ဖော်ပြပေးလိုက်ရပါတယ်။
Source: Original Uploder