ရန်ကုန်တိုင်းဒေသကြီး၊ လှိုင်သာယာမြို့နယ် ရိုးကြီးမှတ်တိုင်အနီး ကမ္ဘာသစ်ဆီဆိုင်ရှေ့တွင် စက်တင်ဘာလ (၂၁) ရက်နေ့ ညနေ (၃း၅၅) မိနစ်ကစပြီး ဗုံး(၆)လုံး ထက်မနည်း ဆက်တိုက်ပေါက်ကွဲခဲ့ပါတယ်။ အဆိုပါ ပေါက်ကွဲမှုတွင် အမျိုးသား (၁) ဦးထိခိုက်မှုရှိခဲ့ပြီး အသက်အန္တရာယ်စိုးရိမ်ရကြောင်း ဒေသခံများထံမှ သိရှိရပါတယ်။
ပေါက်ကွဲမှုဖြစ်ပြီး စစ်ကောင်စီတပ်ဖွဲ့ဝင်များရောက်ရှိလာ ပစ်ခတ်သံများလည်းထွက်ပေါ်လာပါတယ်။ လမ်းတစ်ချို့ကို ပိတ်ဆို့စစ်ဆေးခဲ့ပြီး ညနေ (၅:၂၀) မိနစ်အချိန်တွင် ယင်းနေရာမှ စစ်သားနှင့်ရဲများ ပြန်လည် ထွက်ခွာသွားခဲ့ကြောင်း သိရပါတယ်။
လှိုင်သာယာမြို့နယ်တွင် ဗုံးပေါက်ကွဲမှုများ မကြာခဏဆိုသလိုဖြစ်ပေါ်ခဲ့ပြီး ယခင်ပေါက်ကွဲမှုအများစုက စစ်ကောင်စီတပ်ဖွဲ့ဝင်များရှိရာ စခန်းအနီးမှာသာ ဖြစ်ပေါ်ခဲ့ပေမဲ့ မနေ့ကပေါက်ကွဲမှုကတော့ အများပြည်သူများ သွားလာလှုပ်ရှားရာနေရာမှာဖြစ်ပေါ်ခဲ့ခြင်းဖြစ်ပါတယ်။
ဖေဖော်ဝါရီ ၁ အာဏာသိမ်းမှုကို ပြင်းပြင်းထန်ထန်ဆန့်ကျင်တဲ့ မြို့နယ်များစာရင်းတွင် ပြည်တွင်းရွှေ့ပြောင်းအလုပ်သမားများစွာ နေထိုင်တဲ့ လှိုင်သာယာမြို့နယ်က ထိပ်ဆုံးမှပါဝင်ခဲ့ပြီး စစ်ကောင်စီတပ်ကလည်း ပစ်မှတ်ထားနှိပ်ကွပ်ခံခဲ့ဖူးပါတယ်။
Source : Original Uploader