အစားအသောက်ရှားပါးလွန်းလို့ အလှူရှင်တွေ ဆက်သွယ်တိုင်း အရမ်းပျော်ရကြောင်းရင်ဖွင့်လာတဲ့ PDF လူငယ်လေးတွေ

ဒုက္ခတွေခံရမယ်ဆိုတာသိသိရက်နဲ့ ဒီလမ်းကိုလျှောက်ခဲ့တဲ့ PDF လူငယ်လေးတွေဟာ တောထဲမှာ အနေအစားဆင်းရဲပြီး ဒုက္ခတွေရောက်ခဲ့ရပါတယ်။ PDF တွေအတွက် အဓိကထားပြီး လှူဒါန်းပေးခဲ့တဲ့ ပရဟိတအကျိုးတော်ဆောင်တစ်ယောက်ဟာ သူ့ရဲ့ခံစားချက်တစ်ချို့ကို လူမှုကွန်ယက်မှာ ပြောပြလာခဲ့ပါတယ်။ အမြဲလိုလို မသေထမင်း မသေဟင်းကိုသာမှီဝဲနေကြရပေမယ့် လူပီပီ အရသာကောင်းတာလေးတွေစားချင်တဲ့အချိန်လည်းရှိကြမှာပါ။ ဒီလိုအချိန်မှာ အလှူရှင်က ဆက်သွယ်လာတဲ့အချိန်တိုင်း အရမ်းကိုပျော်တယ်ဆိုတဲ့ PDF လေးတွေရဲ့စကားဟာ သူ့ကို စိတ်မကောင်းဖြစ်စေတယ်လို့ဆိုပါတယ်။

အလှူရှင်တွေရဲ့ကောင်းမွန်တဲ့စေတနာကို လိုအပ်တဲ့ရဲဘော်တွေအတွက် မရရအောင် အန္တရာယ်တွေကြားက သွားပို့ပေးတဲ့ သူ့ရဲ့စေတနာဟာလည်း တကယ်ကိုလေးစားစရာပါ။ ရှုးရှဲလက်ဖက်လေးနဲ့ ထမင်းကို နယ်စားပြီး အသက်ဆက်နေရတဲ့ PDF လေးဟာ ပြည်သူတစ်ရပ်လုံးကိုယ်စား တောထဲမှာအနစ်နာခံပြီး အာဏာရှင်ကိုတိုက်ထုတ်ဖို့ ကြိုးစားနေကြတာဖြစ်ကြောင်း ထပ်ပြီးအသိပေးခဲ့ပါသေးတယ်။

မိဘအိမ်မှာပန်းကန်တောင်မဆေးခဲ့ရတဲ့လူငယ်လေးတွေဟာ တောထဲမှာ ခြင်တွေဖြုတ်တွေ အကိုက်ခံပြီး နေရတဲ့အပြင် ဖြစ်သလိုနေ ဖြစ်သလိုစားရတဲ့ဒဏ်ကို အံတုပြီးနေကြတာဟာ ပြတ်သားတဲ့ဆုံးဖြတ်ချက်နဲ့ ရဲရင့်တဲ့သတ္တိတွေကြောင့်ဆို အသေအချာပါပဲ။ ဒီလိုလူငယ်လေးတွေကို ဝိုင်းဝန်းလှူဒါန်းပေးကြဖို့အတွက် မေတ္တာရပ်ခံကြောင်းပြောပြီး လူငယ်လေးတွေအတွက် အလှူခံပေးလာခဲ့ပါတယ်။

သတင်း အရင်းအမြစ်៖ KEEP on Smiling's FB Acc