ရှမ်းပြည်နယ်တောင်ပိုင်း မိုင်းကိုင်မြို့ရှိ ကတ်ဖွီးကျေးရွာအုပ်စု၊ နားပုံကျေးရွာမှာ နေအိမ်တစ််အိမ် မီးလောင်ရာ ငွေသားသိန်း (၂၀၀) ခန့် ဆုံးရှုံးသွားခဲ့ရတယ်လို့ သိရပါတယ်။ ပြီးခဲ့တဲ့ စက်တင်ဘာ(၁၀)ရက်နေ့ နေ့လည် (၂)နာရီဝန်းကျင် အချိန်လောက်က အိမ်ရှင်များ လယ်ယာသွားနေတဲ့အချိန် နေအိမ်မီးလောင်သွားခဲ့တာ ဖြစ်ပါတယ်။
မီးလောင်မှုကြောင့် အိမ်ထဲက ရှိသမျှပစ္စည်းတွေအားလုံးနဲ့ ငွေသားကျပ်သိန်း(၂၀၀) လောက်ပါသွားတဲ့အပြင် ရွှေတွေနဲ့လက်ဝတ်လက်စားတွေလည်း ပါသွားတယ်လို့ သိရပါတယ်။ နေအိမ်အတွင်းရှိ ပစ္စည်းများအားလုံးနီးပါး မီးလောင်သွားပြီး စပါးကျီ ထားသည့်နေရာနဲ့ မီးဖိုချောင်တော့ မီးမလောင်ခဲ့ဘူးလို့ သိရပြီး မီးလောင်တဲ့ အကြောင်းအရင်းကိုတော့ လက်ရှိအချိန်ထိ အတည်မပြုရသေးပါဘူး။
မီးကတော့ ကောက်ရိုးကနေ စလောင်တာလို့ပြောကြပေမယ့် ဘယ်လိုစလောင်လဲဆိုတာတော့ မသိဘူးဆိုပြီး နီးစပ်သူတစ်ဦးကလည်း ပြောပြလာပါတယ်။ မီးငြိမ်းသတ်ဖို့အတွက် ရေလည်းနည်းသလို မီးသတ်ကားကလည်း လာတာကြာနေတာကြောင့် အိမ်နဲ့ ကောက်ရိုးထားတဲ့နေရာတွေ လောင်ကျွမ်းပျက်စီးခဲ့တယ်လို့ သိရပါတယ်။