ရွာကိုလာတိုက်တဲ့အကြမ်းဖက်တွေကို ခုခံကာကွယ်ရင်း ကျဆုံးသွားတဲ့တပည့်တွေအတွက် ယူကြုံးမရဝမ်းနည်းနေတဲ့ ဆရာမလေး

မကွေးတိုင်းဒေသကြီး ဂန့်ဂေါမြို့နယ်၊ မြင်သားကျေးရွာမှာ စက်တင်ဘာ(၉)ရက်နေ့ နံနက် (၅)နာရီကျော် ဝန်းကျင်လောက်မှာ တိုက်ပွဲတွေ အပြင်းအထန်ဖြစ်ပွားခဲ့တယ်လို့ သိရပါတယ်။ စကစတပ်ဖွဲ့နဲ့ ဒေသခံကာကွယ်ရေးတပ်တို့ကြား ပစ်ခတ်မှုတွေနဲ့ တိုက်ပွဲတွေ ပြင်းထန်ခဲ့ပြီး ဒေသခံပြည်သူတွေ သေဆုံးခဲ့သလို နေအိမ်များလည်း မီးရှို့ဖျက်စီးခံခဲ့ရပါတယ်။ 

တိုက်ပွဲကြောင့် ပြည်သူ့ကာကွယ်ရေးတပ်ဖွဲ့တို့အပါအဝင် ဒေသခံပြည်သူ (၁၀)ဦးနဲ့ အထက် သေဆုံးခဲ့ရသလို နေအိမ် (၁၀)လုံးခန့်လည်း မီးရှို့ဖျက်စီးခံခဲ့ရပြီး ဒီကနေ့မနက်ထိနေအိမ်တွေမီးလောင်နေဆဲဖြစ်တာကြောင့် သက်ကြီးရွယ်အိုတွေနဲ့ ကျန်းမာရေးမကောင်းသူတွေကလွဲရင် ရွာသားအားလုံးနီးပါး တိမ်းရှောင်နေရတယ်လို့ သိရပါတယ်။

တိုက်ပွဲအတွင်း သေဆုံးသွားကြသူတွေထဲမှာ ကျောင်းသားလူငယ်တွေလည်း ပါဝင်နေပြီး ရွာကိုလာတိုက်တဲ့အကြမ်းဖက်တွေကို ခုခံကာကွယ်ရင်း ကျဆုံးသွားတဲ့တပည့်တွေအတွက် ယူကြုံးမရဝမ်းနည်းနေတာတွေကို ဆရာမတစ်ဦးက ရင်ဖွင့်လာပါတယ်။ 

လိမ္မာရေးခြားရှိပြီး ငယ်လွန်းသေးတာကြောင့် ဘယ်အဖွဲ့မှ မလိုက်ဖို့ မှာထားပေမယ့် ရွာနဲ့ တိုင်းပြည်အတွက် အသက်ပေး တာဝန်ကျေလွန်းတဲ့အတွက် ဝမ်းနည်းမှုတွေကို ပြောပြထားတာ ဖြစ်ပါတယ်။

ပြည်သူတွေနဲ့ ဒေသခံတွေကလည်း အသက်ပေး ကြွေလွင့်သွားကြတဲ့ သူရဲကောင်းလေးတွေအတွက် ဖြေမဆည်နိုင်အောင် ဝမ်းနည်းစိတ်မကောင်းဖြစ်နေကြတာလည်း ဖြစ်ပါတယ်။