NUG အစိုးရက ဒီနေ့စက်တင်ဘာလ (၇) ရက်နေ့ရက်စွဲနဲ့ အာဏာရှင်ကို ဝိုင်းဝန်းတော်လှန်ကြဖို့ ကြေညာခဲ့ပြီးနောက် ပြည်သူအများကလည်း ရုတ်ရုတ်သဲသဲဖြစ်သွားခဲ့ပြီး PDF လူငယ်လေးတွေဟာလည်း တရားသောစစ်ပွဲအတွက် အဆင်သင့်ပြင်ဆင်နေကြပါတယ်။ စွန့်လွှတ်စွန့်စားရဲဘော်တွေထဲက PDF လူငယ်လေးတစ်ယောက်ကတော့ တိုက်ပွဲမှာ သူသာကျဆုံးသွားခဲ့ရင် ကျန်ရစ်ခဲ့တဲ့ သူ့ရဲ့ရုပ်အလောင်းကို မြန်မာပြည်အလံလေး လွှမ်းခြုံပေးဖို့တောင်းဆိုလာခဲ့ပါတယ်။
ပြည်သူတွေကိုလည်း ကျန်းမာရေးဂရုစိုက်ကြဖို့အပြင် အောင်သပြေလေးတွေလည်း ကြိုဝယ်ထားကြဖို့ တိုက်တွန်းခဲ့ပါသေးတယ်။ သေဆုံးပြီးနောက်ပိုင်း ငရဲကိုရောက်ခဲ့ရင်တောင် ငရဲထက်ဆိုးတဲ့ ဘဝတွေကို ကြုံခဲ့ရတဲ့အကြောင်းတွေ ငရဲမင်းသိအောင်ပြောပြမယ်လို့လည်း ကြေကွဲစွာပြောခဲ့ပါသေးတယ်။ တောထဲမှာ ပင်ပန်းဆင်းရဲမှုဒဏ်တွေကို အံကြိတ်ခံပြီး ပြည်သူ့အောင်ပွဲအတွက်ကြိုးစားပေးနေကြတာ တကယ်ကိုလေးစားဖို့ကောင်းပါတယ်။
ပြည်သူတွေအနေနဲ့လည်း လိုအပ်တဲ့အခြေခံစားကုန်တွေကြိုတင်ဝယ်ယူထားပြီး မိမိတို့အိမ်မှာပဲ ဘေးကင်းအောင်နေကြဖို့လိုပါတယ်။ PDF လူငယ်လေးတွေဟာလည်း သူတို့ရဲ့ ကျရာတာဝန်ကို ကျေပွန်စွာထမ်းဆောင်ကြတော့မယ့်အကြောင်း အတိအလင်းပြောခဲ့ကြပါတယ်။ တရားသောစစ်ပွဲတိုင်း အောင်နိုင်ပြီး အမှန်တရားဘက်တော်သားများအားလုံး ဘေးရန်ကင်းကြပါစေလို့ ဆုတောင်းပေးပါတယ်။
သတင်း အရင်းအမြစ်៖ Zar Ni Aung's FB Acc