Covid -19 ရောဂါကြောင့် အောက်ဆီဂျင် မလုံလောက်တဲ့ ပြဿနာတွေကို နေရာ အနှံ့အပြားက ပြည်သူတွေ ကြုံတွေ့ ရင်ဆိုင်နေရပါတယ် ။ အောက်ဆီဂျင် ပြတ်လပ်မှုတွေကြောင့် သေဆုံးကြသူတွေလည်း တစ်နေ့ထက်တစ်နေ့ မနည်းတော့ပါဘူး ။ ဒါ့ကြောင့် ခုဆိုရင် တတ်နိုင်သလောက် ပြည်သူတွေ ၊ ပရဟိတ အသင်းတွေ ပူးပေါင်းပြီး အောက်ဆီဂျင် လုံလောက်အောင် ဝယ်ယူလှူဒါန်းမှုတွေ ပြုလုပ်နေပါပြီ။
ပြည်သူတွေရဲ့ ကိုယ်ချင်းစာနာစိတ် အပြည့်ရှိပြီး စည်းလုံးနေမှုတွေကတော့ မိမိပိုင်ဆိုင်တဲ့ အရာတွေကိုပါ ရောင်းချပြီး လှူဒါန်းပါဝင်နေကြတဲ့ အထိပါပဲ ။ တစ်ချို့ဆို အိမ်တွေ မြေဂရမ်တွေနဲ့ပါ အောက်ဆီဂျင် အိုးတွေကို အလဲအထပ် လုပ်ကာလှူဒါန်းကြတာတွေ့ရပါတယ် ။ အခုလည်း မြဝတီမြို့မှာ ပြည်သူတစ်ယောက်က သူရဲ့ ကားကို ရောင်းချကာ အောက်ဆီဂျင်ဝယ်ယူရန်အတွက် အလှူငွေများ လှူဒါန်းခဲ့တဲ့ ပို့စ်လေးကို တွေ့ရပါတယ် ။
ဒီသတင်းကို သိသိချင်း ပြည်သူတွေကလည်း သူရဲ့ မွန်မြတ်တဲ့ လုပ်ရပ်ကို ချီးကျုးခဲ့ကြတာတွေ့ရပါတယ် ။ မြန်မာလူမျိုးတွေရဲ့ သဒ္ဓါတရား ထက်သန်မှု ၊ ဖေးမ ကူညီတတ်မှုတွေကတော့ တကယ်ကို လေးစားစရာတွေပါပဲ ။ ခုလိုဝိုင်းဝန်း လှူဒါန်းမှုတွေကြောင့် မကြာခင်မှာအောက်ဆီဂျင်လိုအပ်နေတဲ့ ပြဿနာတွေကို အမြန်ဆုံး ဖြေရှင်းနိုင်တော့မယ်လို့ ယုံကြည်မိရင်း ပရိသတ်ကြီးအတွက် ဒီသတင်းလေးကို ပြန်လည်ဖော်ပြပေးလိုက်ပါတယ် ။