လူကြီးလူငယ်မရွေး ဘာသာပေါင်းစုံပါဝင်လှုပ်ရှားခဲ့တဲ့ မန္တလေးမြို့ရဲ့ တပ်ပေါင်းစု သပိတ်စစ်ကြောင်း

မြန်မာနိုင်ငံ နေရာအရပ်ရပ်မှာနေထိုင်ကြတဲ့ ပြည်သူတွေဟာ ခုဆိုရင် ကိုယ့်နိုင်ငံအတွက် အစွမ်းကုန် ကြိုးစားအားထုတ်ပြီး တာဝန်ကျေပွန်ပေးနေကြတာဖြစ်ပါတယ် ။စည်းစည်းလုံးလုံးနဲ့ ရရာနေရာတွေကနေ ဆန္ဒထုတ်ဖော်မှုတွေကို ငြိမ်းချမ်းစွာပြုလုပ်လျက်ရှိတာကို တွေ့မြင်ရပါတယ်။ဒီလှုပ်ရှားမှုတွေမှာ အဓိကပါဝင်ကြတဲ့ လူငယ်မျိုးဆက်သစ်လေးတွေရဲ့ တီထွင်နိုင်မှုတွေကလည်း တကယ်ကို လေးစားစရာကောင်းလွန်းတာ အမှန်ပါပဲ။

အခုဆိုရင် ရန်ကုန်အပါအဝင် မန္တလေးစတဲ့ မြို့ကြီးတွေမှာ လူငယ်တွေရဲ့ သပိတ်စစ်ကြောင်းတွေ ပြန်လည်ထွက်ရှိလာတာကိုလည်းတွေ့မြင်ရပါတယ်။ဧပြီလ (၂၈) ရက်နေ့ မန္တလေးမှာလည်း လူကြီးလူငယ်မရွေး ဘာသာပေါင်းစုံဟာ ပြောက်ကျားသပိတ်ကြီးကို နေရာအစုံမှာ လှုပ်ရှားခဲ့ကြတာကိုတွေ့မြင်ရပါတယ်။ဒီသပိတ်စစ်ကြောင်းကြီးမှာဆိုရင် ပြည်သူတွေပါမက သံဃာတော်များလည်းပါဝင်ခဲ့တာလည်းဖြစ်ပါတယ်။

မန္တလေးမြို့ရဲ့ တပ်ပေါင်းစုသပိတ်မှာ ပါဝင်ခဲ့တဲ့ ပြည်သူတစ်ဦးကလည်း " တိုင်းပြည်မှာ မတရားမှုတွေက ကြီးစိုးလာတဲ့အခါ ခုခံတော်လှန်ဖို့က ကျနော်တို့ လူထုရဲ့ သမိုင်းပေး တာဝန်ဖြစ်လာတယ်။ကျနော်တို့ ဒီနွေဦး‌တော်လှန်ရေးသည် လူတစ်ဦးတစ်ယောက် အကျိုးအတွက်၊ ပါတီတစ်စုတစ်ဖွဲ့ အကျိုးအတွက်သက်သက်မျှ ရည်ရွယ်ဆောင်ရွက်နေကြခြင်း မဟုတ်။ကျနော်တို့ ပြည်သူလူထုတစ်ရပ်လုံးက မိမိတို့၏ ခံယူချက်၊ ရပ်တည်ချက်၊ အသိစိတ်ဓာတ်ဖြင့် တော်လှန်ရေး အရေးတော်ပုံကြီးတွင် ဝင်ရောက်ဆင်နွှဲနေကြခြင်း ဖြစ်သည်။"လို့ဆိုကာ သူရဲ့ရင်တွင်းခံစားချက်လေးတွေကိုလည်းဖော်ပြထားတာတွေ့မြင်ရပါတယ်။ဖိနှိပ်ခံရမှုတွေကြားထဲကနေ ခုလိုအမျိုးမျိုးသောပုံစံတွေနဲ့ ဆန္ဒထုတ်ဖော်မှုတွေရှိနေတာ တကယ်ကိုလေးစားစရာမြင်ကွင်းတွေပါပဲနော်။