ထူးခြားတဲ့ အရွက်ပုံစံ အတက်အလက်တွေကြောင့် ထင်ရှားတဲ့ Phycodurus eques သို့မဟုတ် Leafy seadragon ကတော့ Syugnathidae မျိုးစုကဆင်းသက်လာပြီး Phycodurus မျိုးစုရဲ့ တစ်ခုတည်းကျန်တဲ့ ငါးမျိုးစိတ်တစ်ခုပဲ ဖြစ်ပါတယ်။ ဒီ Leafy seadragon ရေနဂါးတွေကို ဩစတေးလျနိုင်ငံ တောင်ပိုင်းရေပြင်မှာသာ တွေ့ရပြီး အများအားဖြင့် သဲဖုံးနေတဲ့ ကျောက်တုံးများ ၊ ပင်လယ်မြက်များ ပတ်ပတ်လည် မီတာ ၅၀ ( ပေ ၁၆၀ ) နက်တဲ့ ရေပြင်နေရာတွေမှာ ရှင်သန်ကြပါတယ်။ ထူးခြားတဲ့ အရွက်ပုံစံ အတက်အလက်တွေကြောင့် ပင်လယ်မြက် ၊ ရေညှိ ၊ ရေမှော်တွေနဲ့ ကွယ်ဝှက် နေထိုင်ကြပြီး သီးခြားတစ်ကောင်တည်း အေးဆေး နေထိုင်လေ့ ရှိပါတယ်။
ဒါအပြင် Leafy seadragon တို့ရဲ့ အရွက်ပုံ အခက်အလက်တွေဟာ ရေကူးရာမှာလည်း ကူညီပေးပြီး အမှတ်တမဲ့ ကြည့်မိတဲ့အခါ မျောလွင့်နေတဲ့ ပင်လယ်ရေမှော် နဲ့တောင် ဆင်တူကြပါတယ်။ပင်လယ်မြင်းတွေထက် ပိုကြီးတတ်ကြပြီး အရွယ်ရောက်ပြီးတဲ့ Leafy seadragon တစ်ကောင်ဟာ ၂၀ မှ ၂၄ စင်တီမီတာ ( ၈ မှ ၉.၅ လက်မ ) အထိ ကြီးထွားကြပါတယ်။ ရေထဲက Plankton နဲ့ crustaceans ငယ်လေးတွေကို အဓိက စားသုံးတဲ့ ရှည်လျားတဲ့ ပါးစပ်ပါရှိပြီး ခန္ဓာကိုယ်တစ်လျှောက် ဆူးတောင် အချွန်တို့ ပါရှိကြပါတယ်။ မျိုးပွားတဲ့ မိတ်လိုက်ရာသီအချိန်မှ လွဲ ကျန်တဲ့အချိန်တွေမှာ တစ်ကိုယ်တည်း နေတတ်တဲ့ Leafy seadragon တွေဟာ တစ်ခါမျိုးပွားရင် ပန်းရောင် ဥ ၂၅၀ အထိ ထုတ်လွှတ်နိုင်ကြပါတယ်။
ထူးခြားတဲ့ ဆူးတောင် အရွက်တွေနဲ့ Leafy seadragon တွေဟာ တစ်နာရီကို မီတာ ၁၅၀ ( ၄၉၀ ပေ ) အထိ ရွေ့လျားနိုင်ခဲ့တယ်ဟု မှတ်တမ်းတွေ ရှိတာကြောင့် ရေကူးဆရာကြီးတွေ ဆိုလည်း မမှားပါဘူး။ ထူးခြားတဲ့ ခန္ဓာကိုယ် ဖွဲ့စည်းမှုကြောင့် လူသိများ ထင်ရှားခဲ့တဲ့ ဒီ ရေနဂါးတွေကို ပြတိုက်တွေမှာ ဗဟုသုတရဖွယ် ပြသထားကြပြီး ရေထုညစ်ညမ်းမှု ၊ လူတွေရဲ့ စည်းကမ်းမဲ့ ဖမ်းဆီးမှုတွေကြောင့် အကောင်အရေအတွက် များစွာ လျော့ကျနေပြီပဲ ဖြစ်ပါတယ်။ ဒါအပြင် Leafy seadragon တွေဟာ ပင်လယ်ရေပြင်မှာ အလေ့ကျ နေထိုင်တဲ့ ရေနေသတ္တဝါ ဖြစ်တာကြောင့် မွေးမြူရေးကန်တွေမှာ ရှင်သန်နိုင်ချေ နည်းကြပါတယ်။ လက်ရှိမှာတော့ စနစ်တကျ ပြန်လည်မွေးမြူလျက်ရှိပြီး Leafy seadragon တွေကို စည်းကမ်းမဲ့ ဖမ်းဆီးမှုအား အပြင်းအထန် တားမြစ်ထားပါတယ်။